ԲԴԽ միակ անդամը, որն աջակցեց դատարանների մուտքերն արգելափակելու Փաշինյանի կոչին, հրաժարականի դիմում է ներկայացրել

Բարձրագույն խորհրդի անդամ Հայկ Հովհաննիսյանը հրաժարական է ներկայացրել։

Այս մասին նա գրառում է կատարել ֆեյսբուքյան իր էջում։ Հայկ Հովհաննիսյանը ԲԴԽ անդամի պաշտոնում ընտրվել էր 2018թ,-ի փետրվարի 28-ին։

Հիշեցնենք, որ Հայկ Հովհաննիսյանը ԲԴԽ միակ անդամն էր, որը դատարանների մուտքերը փակելու Նիկոլ Փաշինյանի կոչը ողջունել էր՝ նշելով, որ այն ուղղված չէ «դատարանների բնականոն գործունեության խաթարմանը»։

«Հակառակը, կոչ է արվում ազգային համախմբման, որպեսզի դատարանները ծավալեն իրապես բնականոն գործունեություն` ծառայելով քաղաքացիներին։

Մենք արժանի են ունենալու նոր որակներով և առաքելությամբ օժտված դատարաններ»,-ասել էր նա։

Հայկ Հովհաննիսյանի հրաժարականի մասին գրառումն ամբողջությամբ ներկայացնում ենք ստորև․

«Հարգելի հայրենակիցներ,

Այսօր ներկայացրել եմ հրաժարական` հետևյալ պատճառաբանությամբ.

Հայաստանի Հանրապետության ժողովրդի առջև երդմանս համաձայն, բարձր պաշտոնը ստանձնելուց ի վեր նախաձեռնել և առաջնորդել եմ մի շարք ծրագրեր` միտված դատարանների արդյունավետության, թափանցիկության և հաշվետվողականության բարձրացմանն ու միջազգային լավագույն չափանիշերին համապատասխանեցմանը։

Համոզված եմ, որ այդ ծրագրերի գործարկումն ու իրականացումը կբարձրացնի դատական իշխանության հանդեպ հանրային վստահությունը և կնպաստի Հայաստանի տնտեսական մրցակցային դաշտի ու ներդրումային միջավայրի գրավչության բարելավմանը։

Ցավոք, Բարձրագույն Դատական Խորհրդի, որպես անկախ սահմանադրական մարմնի, գործունեությունն այդպես էլ չի համապատասխանում դատական խորհուրդների միջազգային լավագույն փորձին։

Միաժամանակ, ես պարտավոր էի իմ կողմից իրականացվող ծրագրերը հասցնել տրամաբանական ավարտի և նպատակահարմար չէի գտնում ավելի վաղ հրաժարական ներկայացնել։

Վստահ եմ, որ դատական բարեփոխումները պետք է իրականացվեն հրատապ և արդյունավետ կարգով, ինչի մասին բազմիցս բարձրաձայնել եմ։
Մինչդեռ, իմ կողմից առաջ քաշված մի շարք գաղափարներ և ծրագրեր Խորհրդում չեն կարևորում։

Վերոհիշյալի հաշվառմամբ, այսօր Բարձրագույն դատական խորհրդին ներկայացրել եմ հրաժարականի դիմում, հորդորելով լիազորություններիս դադարման հարցը քննարկել իմ բացակայությամբ»։

Խնդրում ենք գնահատել

Facebooktwitterredditpinterestlinkedinmail
Կիսվել
ContactUs.com