«ՌԴ-ն, Հայաստանն ու Ադրբեջանը կարող են ամենամոտ ապագայում տարածաշրջանում կրակի դադարեցման վերահսկման մեխանիզմ համաձայնեցնել». Լավրով

ՌԴ արտգործնախարար Սերգեյ Լավրովը, անդրադառնալով ԼՂ հակամարտությանը, հայտարարել է, որ Ռուսաստանը, Հայաստանն ու Ադրբեջանը կարող են ամենամոտ ապագայում համաձայնեցնել տարածաշրջանում կրակի դադարեցման վերահսկման մեխանիզմը:

Ինչպես հայտնում է ՏԱՍՍ գործակալությունը, Լավրովն այս մասին ասել է Եվրոպայի խորհրդի գլխավոր քարտուղար Մարիա Պեյչինովիչ Բուրիչի հետ հանդիպման արդյունքներով հրավիրված մամուլի ասուլիսի ժամանակ:

«Որպեսզի կրակի դադարեցումն աշխատի, մենք դրանում արդեն համոզվել ենք ընդունված և ցամաքում վրա իրավիճակի արմատապես փոփոխությունը կանխած երկու փաստաթղթերից հետո, անհրաժեշտ է  կրակի դադարեցման պահպանման վերահսկման մեխանիզմի ստեղծում: Մենք այդ ուղղությամբ ակտիվ աշխատում ենք, այդ թվում՝ մեր պաշտպանության նախարարությունը, նախևառաջ Հայաստանից և Ադրբեջանից մեր գործընկերների հետ: Լիահույս եմ՝ ամենամոտ ապագայում նման մեխանիզմ կհամաձայնեցվի»,-ասել է Լավրովը:

Ավելի վաղ Լավրովը հայտարարել է, որ անհրաժեշտ է վերջ տալ ռազմական հռետորաբանության ավելացմանն ու դադարեցնել ռազմական գործողությունները Լեռնային Ղարաբաղում:

«Վստահ ենք, որ հիմա ամենակարևորը և, հավանաբար, դա մեծ ջանքեր չի պահանջում, կողմերի միջև, ինչպես նաև պատասխանատու միջազգային խաղացողների գծով անհապաղ ռազմական հռետորաբանության ավելացման դադարեցումն է: Դա ինչ-որ մեծ ջանքեր չի պահանջում: Հաջորդ միանգամայն անհրաժեշտ քայլը, որը պետք է ձեռնարկվի ռազմական հռետորաբանության ավելացման դադարեցման հետ միաժամանակ, ռազմական գործողություններին, քաղաքացիական օբյեկտներին հարվածներին վերջ տալն է»,-ընդգծել է Լավրովը:

Նշենք, որ ԵԽ գլխավոր քարտուղար Մարիա Պեյչինովիչ Բուրիչը, ելույթ ունենալով Միջազգային հարաբերությունների Մոսկվայի պետական ինստիտուտում, հայտարարել է, որ Հայաստանն ու Ադրբեջանը պարտավորություններ ունեն Եվրոպայի խորհրդի առջև՝ իրենց տարածքներում մարդու իրավունքների պահպանման, ինչպես նաև Լեռնային Ղարաբաղի հակամարտության խաղաղ կարգավորման վերաբերյալ։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 19-ի դրությամբ Արցախի զինուժը խոցել է հակառակորդի՝ 16 ուղղաթիռ, 22 ինքնաթիռ, 195 անօդաչու թռչող սարք, 566 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6259 զոհ։ Հայկական կողմից, նախնական տվյալներով, կա 673 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 36 քաղաքացիական անձ, վիրավորվել է 115 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։ԼՐԱՀՈՍ

Facebooktwitterredditpinterestlinkedinmail

Be the first to comment on "«ՌԴ-ն, Հայաստանն ու Ադրբեջանը կարող են ամենամոտ ապագայում տարածաշրջանում կրակի դադարեցման վերահսկման մեխանիզմ համաձայնեցնել». Լավրով"

Leave a comment

Your email address will not be published.


*