Անհրաժեշտ է ակտիվ քա­ղա­քականություն վարել մասնագիտական կրթության, որակավորման և վերա­­որակա­վոր­ման բնագավառներում. Արմենուհի Հայրապետյան

Սույն թվականի հունիսի 20-ի արտահերթ ընտրությունների քարոզարշավն անցնում է  բավականին թեժ մթնոլորտում: Կուսակցությունների և դաշինքների ներկայացուցիչները խոսում են անվտանգության, տարբեր ոլորտների բարելավման  իրենց ծրագրերից,  ներկայացնում ստեղծված իրավիճակից հնարավոր լուծումների տարբերակները:

gmpress.am-ը  պարբերաբար իր ընթերցողներին է  ներկայացնում  նախընտրական իրավիճակը՝ հաշվի առնելով նաև վերջիններիս խնդրանքները՝ թեկնածուներին՝ իրենց հուզող հարցերին անդրադառնալու: Այս առումով, վերջերս անդրադարձել ենք «Ազատական» կուսակցությանը, զրուցել ընտրացուցակի  առաջին քսանյակում ընդգրկված լրագրող, լեզվաբան, աշխատակազմի կառավարիչ Արմենուհի Հայրապետյանի հետ՝ խոսելով խոցելի խմբերի, անվտանգության, կրթության, գիտության, առողջապահության ոլորտներին վերաբերող ծրագրերին: Մեր թղթակցի հետ նախորդ զրույցում տիկին Հայրապետյանը անդրադարձավ նաև ամենակարևոր հարցերից մեկին՝ մարտունակ բանակի ստեղծմանը: Նա նշեց, որ կուսակցության նախընտրական ցուցակը գլխավորում է ԼՂՀ Պաշտպանության բանակի նախկին հրամանատար, Արցախի հերոս Սամվել Բաբայանը, ով, այս ոլորտում բավականին հարուստ, հաղթական փորձ ունի, որն իրենց  համար շատ հուսադրող է և ոգևորիչ: Ի դեպ, պարոն Բաբայանը ևս բավականին ակտիվ նախընտրական գործընթացում է, և տարբեր լրատվամիջոցներին  տված հարցազրույցների ժամանակ պարբերաբար անդրադառնում է տնտեսական քաղաքականությանն ու բանակին, նշելով, որ ՀՀ ինքնիշխանության միակ անվերապահ երաշխավորը մարտունակ ԶՈՒ-ն է՝ ի դեմս արհեստավարժ բանակի, ինչն էլ հենց, կուսակցության ծրագրի հիմնաքարային դրույթներից մեկն է:

Տիկին Հայրապետյան, «Ազատական» կուսակցությունն ունի բավականին ծավալուն և ընդգրկուն ծրագիր,  մինչ հաջորդ ոլորտի մասին խոսելը, կարո՞ղ եք հակիրճ ներկայացնել  կուսակցության կողմնորոշումները և նպատակները:

Առաջնահերթ ցանկանում եմ ևս մեկ անգամ շնորհակալություն հայտնել հայրենիքի ապագայով մտահոգ քաղաքացիներին, քանզի բոլորիս համար շատ հուսադրող հանգամանք է մարդկանց հետաքրքրությունը մեր կուսակցական ծրագրի հանդեպ: Անդրադառնալով հարցին՝ ասեմ, որ  մենք ներկայացնում ենք կենտրոնամետ կուսակցություն, որը հետապնդում է հետևյալ նպատակները.

• Հայաստանի քաղաքացիների կյանքի բոլոր ոլորտների առողջացման հիմքերի ստեղծում։
• Հայաստանի քաղաքացիների ներքին և արտաքին անվտանգության և խաղաղ կյանքի ապահովում։
• Կենտրոնաձիգ, ամուր և կարգապահ պետական կառավարման արդյունավետ համակարգի ստեղծում։
• Անհատի ինքնադրսևորման, կարողությունների զարգացման և իրացման հավասար հնարավորությունների և բարենպաստ միջավայրի ստեղծում։
• Մրցունակ տնտեսության միջոցով հանրային բարիքների ստեղծման և արդար բաշխման հիմքերի ստեղծում։
• Աղքատության վերացում և պարենային ապահովություն։
• Հոգևոր և մշակութային առողջ մթնոլորտի ստեղծում և զարգացման ապահովում։
• Օրենքի գերակայության հաստատում:

Մենք համոզված ենք, որ ժողովրդի առջև ծառացած բարդագույն խնդիրների լուծումը հնարավոր է միայն կրթության, գիտության և առողջապահության համակարգերի հիմնարար վերափոխմամբ և մարդկանց ֆիզիկական,  մտավոր ներուժի կայունացմանն ու շեշտակի բարձրացմամբ :

Վերոնշյալ ոլորտների բարեփոխումները գերակա են՝ տնտեսական առաջընթացի և հզոր ապահովության համակարգ ստեղծելու համար, որի հիմքում կլինի ժամանակակից տեխնիկային և տեխնոլոգիաներին տիրապետող հզոր և մասնագիտացված բանակը:

Ինչպես ցույց է տալիս զարգացած երկրների փորձը՝ պետական քաղաքականությունը կարող է  էականորեն ազդել տնտեսական աճի վրա, իսկ մեր երկրում ստեղծված իրավիճակը գրեթե զրոյացրել է տնտեսական քաղաքականության արդյունքները….. ո՞րն է մրցունակ տնտեսության ստեղծման Ձեր  առաջարկը:

Տնտեսական քաղաքականության բնագավառում կուսակցությունը հետամուտ է լինելու մրցունակ տնտեսության ստեղծմանը: Այդ նպատակով, տնտեսական քաղաքականության բնագավառում գերակա խնդիրները և ուղղությունները  լինելու են՝ պե­տու­թյան դերի ակտիվաց­ումն այն բնագավառներում, որտեղ շուկայական, տնտեսական հարա­բե­րություն­նե­րը չեն կարող գործել կամ չեն գործում, երկրի ներդրումային գրավչության բարձրացումը, փոքր ձեռնարկատիրության զարգացմանն աջակցությունը, արտաքին առևտրի ազատականացումը և մաքսային ընթացակարգերի պարզեցումը, հարկային բեռի նվազեցումը, հարկային օրենսդրության պարզեցումն ու  հստակեցումը և այլն:

Տնտեսական քաղաքականության հիմքում ընկած է սեփականության բոլոր ձևերի և գույքային իրավունքների արդյունավետ պաշտպանություն սկզբունքը։

Պետական քա­ղա­քա­կա­նությունը պետք է կոչված լինի մարդկանց նախաձեռնողական ներուժի առավելագույն օգտագործման ապահովմանը:

Այդ նպատակով պետությունը պետք է, առաջին հերթին, ապահովի տնտեսության զարգացման գիտական հիմքերը և հիմնավորումները:

Մենք գտնում ենք, որ Հայաստանի համար զարգացման հիմնական նախա­դրյալ­նե­րից է բաց տնտեսությունը, ուստի՝ անհրաժեշտ է վերացնել ապրանքների և ծառայությունների ա­զատ հոսքին խոչ­ընդոտող բոլոր օրենքները, ընթացակարգերը և կամայական վարչարարության պրակտի­կան:

Փոքր և միջին բիզնես ձեռնարկությունները մեզանում  ավելի քիչ հնարավորություններ ունեն, առավել  խոցելի են մրցակցային դաշտում, վարչական ծախսերի ավելի մեծ բեռ են կրում…… ինչպիսի՞ն են  դրանք կարգավորելու տարբերակները:

Մասնավոր բիզնեսը, անկախ իր մեծությունից և ոլորտից, պետք է հավասարաչափ պաշտպանված լինի և գործի հավասար մրցակցային դաշտում: Տնտեսության զարգացման և զբաղվածության ընդլայնման համար հավասարապես  կարևոր են ինչպես փոքր և միջին ձեռնարկությունները, այնպես էլ խոշոր բիզնեսները: Այս առումով, պետական քաղաքականությունը պետք է հնարավորին չափ միտված լինի մեղմելու փոքր ձեռնարկությունների գործարքային և հարակից վարչական այլ ծախսերի բեռը:

Տիկին Հայրապետյան, տնտեսական քաղաքականությունն իրենց ներկայացնում է նաև զբաղվածության ընդլայնում, այս առումո՞վ ինչ ծրագիր ունեք՝ հաշվի առնելով նաև վերջին ժամանակներում գերխնդիր դարձած գործազրկության աճը:

Իշխանությունները պատասխանատու են երկրում գործազրկության մա­­կարդակի բարձրացման համար: Ներկայումս իրական գործազրկության մակարդակը քաղաքային բնակավայ­րե­րում անթույլատրելի բարձր է, իսկ գյուղական բնակչու­թյան ցուցանիշները իրական վիճակը չեն արտացոլում, այդ իսկ պատճառով էլ զբաղվա­ծու­թյան ընդլայնումը տնտեսական քաղաքականության բնագավառում մեր գերնպատակն է լինելու:

Տնտեսական քաղաքականության հա­ջո­ղությունները և ան­հա­ջողությունները պետք է գնահատվեն` առաջին հերթին զբաղվա­ծու­թյան ընդլայնման ցուցանիշի տեսակետից:

Անհրաժեշտ է ակտիվ քա­ղա­քականություն վարել մասնագիտական կրթության, որակավորման և վերա­­որակա­վոր­ման բնագավառներում: Հատուկ ուշադրության են արժանի աշ­խա­տանքի շուկա առաջին անգամ մուտք գործող երիտասարդների համար առավել բարե­նպաստ պայմաններ ստեղծելու և ներկայիս խոչընդոտները վերացնելու խնդիրները:

Առանձին ծրագրային խնդիր է գյուղատնտեսությունում թերզբաղվածության վերացումը:

Շարունակելի….

Զրույցը վարեց` լրագրող, մեդիափորձագետ Մանե Մանուկյանը