Կյանքը de factoՀասարակություն

Սահմանապահ համայնքների տնտեսական ու տեխնիկական վերազինումը ժամանակի հրամայականն է. Արմենուհի Հայրապետյան

343views

Երկրի զարգացմանն ուղղված առանցքային քայլերից է նաև տրանսպորտային քաղաքականությունը, հատկապես մեր՝ փոքր տնտեսության պայմաններում առանց բազմա­կող­մանի և զարգացած տրանսպորտային համակարգի տնտեսական զարգացումն անհնար է պատկերացնել:

Իրավիճակը, հատկապես վերջին դեպքերից հետո, խնդրահարույց է ավիացիոն ու երկա­թու­ղային տրանսպորտում: Շարունակելով մեզ հետ զրույցը «Ազատական» կուսակցության ընտրացուցակի  առաջին քսանյակում ընդգրկված լրագրող, լեզվաբան, աշխատակազմի կառավարիչ Արմենուհի Հայրապետյանը նշեց, որ բազմա­թիվ ճյուղերի զարգացման հեռանկարներն ուղղա­կիո­րեն կախված են տրանսպորտի հենց այս տեսակներից.  «Դժվար է պատկերացնել, օրինակ, զբո­սաշրջության զարգացումը կամ գործարար միջավայրի բարելավումը Հայաս­տա­նի Հանրապետությունում, եթե ավիացիայի բնագավառը կտրուկ չբարելավվի: Եթե երկա­թ­ուղային տրանսպոր­տի հուսա­լիու­թյունը և ծախսերը լրջորեն չվերանայվեն՝ արտահանմանն ուղղված քաղաքականության հաջողությունները ևս վտանգված կլինեն:

«Ազատական» կուսակցության ծրագրում այս մասով նախատեսված է ավիացիոն բնագավառում սահմանել և հետևողականորեն իրականացնել ազատ երկնքի քա­ղաքականություն, իսկ երկաթուղային տրանսպորտի բնագավառում՝  վերանայել կառավարման ներկա համակարգը»,- ասաց պատգամավորության թեկնածուն:

Անդրադառնալով հեռավոր և մեկուսացված բնակավայրերում բնակչության կենսամակարդակի խնդիրներին և կուսակցության այս մասով նախատեսվելիք ծրագրին՝ տիկին Հայրապետյանն ասաց, որ  ցանկացած բնակավայրի զարգացման համար ճանապարհների, սոցիալական ենթակառուցվածքների և ունիվերսալ ծառայությունների առկայությունն ու որակը անհրաժեշտ նախադրյալներ են: Հեռավոր և մեկուսացված բնակավայրերը, պատգամավորության թեկնածուի խոսքերով,  տնտեսական արդյունավետության, աշխատանքային պայմանների տեսանկյունից կարող են գրավիչ չլինել: Պետական ներդրումային և կարգավորման քաղաքականությունը պետք է համարժեքորեն արտահայտի տարածքային գերակայությունների խնդիրը: Ժամանակի հրամայականն է սահմանապահ համայնքների տնտեսական ու տեխնիկական վերազինումը, հիմնավոր ենթակառուցվածքների զարգացումը. «Նկատի ունենալով հեռավոր և մեկուսացված, սահմանապահ բնակավայրերի օբյեկտիվորեն ավելի ցածր ֆիսկալ պոտենցիալը` այս բնակավայրերը պետք է հավակնեն ավելի մեծ բյուջետային հատկացումների, որը պետք է իրականցնել բյուջետային համահարթեցման օրենսդրության վերանայման ճանապարհով:

Պետք է մշակել ու ներդնել կենսական, ինքնաբավ բնակավայրերի նոր մոդելներ՝ առանձին տնային տնտեսություններից մինչև համատեղ տնտեսություններ և զարգացած ենթակառույցներով օպտիմալ բնակավայրեր՝ 3000-5000 բնակիչներով»,- նշեց «Ազատական» կուսակցության  ընտրացուցակում ընդգրկված պատգամավորության թեկնածուն՝            հավելելով, որ կուսակցության ծրագիրը բավականին իրատեսական է, և մարդկանց վստահության քվեի արդյունքում կյանքի կոչվելով՝ շատ կարճ ժամանակահատվածում կապրենք մեր երազած Հայաստանում:

 

 

 

 

Leave a Response