Պաշտոնյայի կողմից սուտ ասելը պետք է քրեորեն պատժելի արարք դարձնել. Ռոբերտ Քոչարյան
«Մեր հասարակության մոտ ինձ համար 2 գործոն բացահայտվեց, ես չէի մտածում, որ մենք կարող ենք այդքան հանդուրժողական լինել ստի նկատմամբ և կարող ենք այդքան հանդուրժող լինել ոչ պրոֆեսիոնալիզմի նկատմամբ, եթե հանդուրժողականությունը մնա այս 2 երևույթի նկատմամբ, մեր հասարակությունը երբեք չի առողջանալու»,- իր աջակիցների հետ հանդիպման ժամանակ ասել է ՀՀ երկրորդ նախագահ Ռոբերտ Քոչարյանը։
Քոչարյանը նկատեց, որ չի եղել մի դեպք, որ ՀՀ այսօրվա առաջին դեմքը (Նիկոլ Փաշինյանը) ելույթ ունենա, և րոպեներ անց չպարզվի, որ նորից խաբել է: Եվ այդքանից հետո հետո նա շարունակում է ունենալ մեծ թվով համակիրներ, ինչը նորմալ չէ․
«Պաշտոնյայի կողմից սուտ ասելը պետք է ուղղակի քրեորեն պատժելի արարք դարձնել։ Առնվազն օրենսգրքում պետք է մի բան մտցնել, որ եթե ապացուցվի, որ պաշտոնյան ստել է՝ ինքը կորցնում է պաշտոնը, և, օրինակ, 5 տարի իրավունք չունի զբաղեցնել որևէ պետական պաշտոն։ Այդպիսի խիստ մեթոդներ է պետք կիրառել այս բանից ձերբազատվելու համար, որովհետև մի հասարակությունում դու կարող ես աջ ու ձախ ստել, ստել, ստել, և դա դառնա մեր կենցաղի մի մաս, իսկ առաջին դեմքը պետք է օրինակ ծառայի․․․»։
Հանդիպման ընթացքում Ռոբերտ Քոչարյանը խոսեց պետական կառավարման համակարգում բարձր պաշտոններ զբաղեցնող, սակայն ոլորտներից ընդհանրապես չհասկացող երևույթի և դրա հետևանքների մասին․
«Մարդ են նշանակում նախարար, որը կյանքում 3 մարդ ղեկավարած չկա, երբ մարդու կենսագրությունը տեղավորվում է 3 էջում՝ դպրոցն ավարտեց, ինստիտուտն ավարտեց, վերջ, էլ չկա, էլ բան չկա գրելու, այդ մարդն աշխատանքային գրքույկ էլ չուներ, որովհետև ոչ մի տեղ չի էլ աշխատել և հանկարծ դառնում է նախարար, հետո էլ մի քանի ոլորտներ միացնում են, և 6-7 ոլորտի պատասխանատու է դառնում, արդյունքը դառնալու է տգիտության ծայրահեղ մի աստիճանը։ Մենք չենք կարող մեր հանրությունն առողջացնել, եթե այս որակները չփոխենք»։
Անդրադառնալով քրեական գործեր հարուցելու պրակտիկային, Ռոբերտ Քոչարյանը նկատեց, որ վերջին տարիներին Հայաստանում մարդիկ սկսել են դրանով հպարտանալ, ինչը նորմալ երևույթ չէ․
«Այսպես չպետք է լինի, և երբ որ երկրում գյուղապետ չկա, որի վրա 2-3 քրեական գործ հարուցված չլինի, քաղաքապետ կա, որի վրա 28 քրեական գործ է հարուցված, և այդ քրեական գործը հարուցելուց հետո կան դեպքեր, որ մոտ 2 տարի որևէ քննչական գործողություն չի արվում։ Պատկերացնում եք, չէ՞, քրեական գործը հարուցվում է, երբ այդ գյուղապետին պետք է ինչ-որ բան հասկացնել, միանգամից ասում են՝ հիշո՞ւմ ես, քրեական գործ կար։ Սա նորմալ չի, երբ նույնիսկ օրինապաշտ քաղաքացին ինչ-որ ժամանակի ընթացքում այնպես է հարմարվում այդ քրեական գործին, որ սկսում է այլ կերպ նայել՝ քրեական գործ է, էլի, ի՞նչ է եղել։ Իրոք շատ վատ բան է, և մենք այս իշխանությանը հրաժեշտ տալուց հետո պետք է անենք ամեն ինչ, որ մեր երկրում վերադառնա այն վերաբերմունքը, որ լավ չի քրեական գործի տակ լինելը»։
Հարցին՝ թե արդյոք նեղացած չե՞ք ժողովրդից, Ռոբերտ Քոչարյանը կատակելով պատասխանել է․
«Հիմա ինձ Աբու-Լալա Մահարիի տեղ բան անեմ․․․ ինքն էլ էր նեղացած աշխարհից, ամեն ինչից․․․ Ընդհանրապես, սեփական ժողովրդից նեղանալը երևի ամենից անշնորհակալ գործն է, հակառակը, պետք է փորձես հասկանալ, թե ինչո՞ւ այդպես եղավ, ընդհանրապես ամեն ինչում, եթե ինչ-որ պրոբլեմի առնչվել ես, առաջին հերթին դու քեզ հարց տուր՝ «Ի՞նչ սխալ եմ ես թույլ տվել», միգուցե այդ ամենի մեջ քո մեղքի չափաբաժինը նաև կա․․․ Հետո, եթե նեղացած լինեի՝ հիմա ի՞նչ եմ անում, հետ եմ գալիս իշխանության, որ վրեժս լուծե՞մ ժողովրդից, թե՞ ինչ։ Հակառակը՝ գալու ենք և՛ ժողովրդի խնդիրները լուծենք, և՛ կենսամակարդակը բարձրացնենք․․․»։
Քոչարյանը աջակիցների հետ հանդիպմանն անդրադարձել է նաև առաջիկայում անցկացվելիք արտահերթ խորհրդարանական ընտրություններին և ապագա շտաբի ձևավորման հարցին․
«Ընտրությունները շատ կոնկրետ տեխնոլոգիա է, և կարծում եմ՝ առանձնապես շատ հորինելու բան չկա»: Ընտրությունները նշանակում է՝ հսկայածավալ քարոզչական աշխատանք, նշանակում է իրավական հատվածը՝ հանձնաժողովների ձևավորում, մասնակցություն այդ հանձնաժողովներին, մի մեծ բանակ պետք է ունենալ վստահված անձանց, որոնք պինդ են, որոնք ընտրական տեղամասերում կարողանալու են պայքարել այդ ձայների համար, և պետք է ունենանք նաև մի մեծ բանակ, որը կերաշխավորի, որ այդ ձայները չեն փորձելու մեզանից գողանալ։ Ըստ էության ապագա շտաբը գրեթե ձևավորված է, աշխատանքները գնում են, և անպայման ներգրավվածության հնարավորություն բոլորդ ունենալու եք․․․ Մոտ 2 շաբաթ մենք մշակում էինք այս ամենը, և կարծում եմ՝ մոտակա 1 շաբաթվա ընթացքում, 10 օրվա ընթացքում ձեզ հետ նաև աշխատանք կկատարվի ներգրավվածությունն ապահովելու համար։ Ընտրությունները թեթև չեն լինելու և հսկայական քարոզչական աշխատանքի անհրաժեշտություն լինելու է։ Հասկանում եմ, որ փողոցային պայքարի մեջ ենք մասնագիտացել, կարծում եմ՝ հավանաբար նման պայքար լինելու է, հուսով եմ, որ հրաժարականից հետո նաև մեր իրավապահ համակարգն ավելի զուսպ իրեն կպահի՝ հասկանալով, որ այս մարդը վերընտրվելու շանսեր չունի»։
Ռոբերտ Քոչարյանը խոսել է նաև իշխանությունների կողմից ընտրությունների արդյունքները կեղծելու հնարավոր տարբերակի մասին․
«Իշխանությունը պետք է իմանա, որ յուրաքանչյուր քայլ ընտրությունները կեղծելու համար այնպիսի մի արձագանք է ստանալու, որի տակից ինքը դուրս չի գալու, և այդ արձագանքը պետք է լինի ագրեսիվ, վճռական․․․»։
