Կորոնավիրուսի դեմ ռուսական պատվաստանյութով 50 երկիր է հետաքրքրվել. РИА Новости
![](https://gmpress.am/wp-content/uploads/2020/09/2643bf8348d4542ead3b1fabde9a6111_M-e1600068122423.jpg)
Ռուսաստանը 50 երկրների հետ քննարկում է կորոնավիրուսի դեմ իր պատրաստած պատվաստանյութի մատակարարումը: Այս մասին Ռուսաստանի առաջին ալիքի եթերում հայտարարել է Ուղիղ ներդրումների ռուսական հիմնադրամի ղեկավար Կիրիլլ Դմիտրիևը, գրում է РИА Новости գործակալությունը:
Դմիտրիևը նշել է, որ Ռուսաստանը դեռևս կարող է արտադրել «միայն որոշակի քանակությամբ» դեղամիջոց, ուստի հիմնադրամը համագործակցում է սահմանափակ քանակով երկրների հետ:
«Մենք աշխատում ենք 50 երկրի հետ: Կենտրոնացած ենք 20-ի վրա, դրանցում մենք լուրջ առաջընթաց ենք գրանցել»,-ասել է Դմիտրիևը:
Նա ավելացրել է, որ շատ երկրներում սկսվում են ռուսական պատվաստանյութի կլինիկական փորձարկումները: Այն կարող է կարգավորման հաստատում ստանալ հոկտեմբերին կամ նոյեմբերին:
«Ուստի մենք կենտրոնանում ենք այն երկրների վրա, որոնք շահագրգռված են արագորեն հաստատել ռուսական պատվաստանյութը և որոնք զգալի հետաքրքրություն են ցուցաբերում Ռուսաստանի հետ գործընկերության ոլորտում»,-բացատրել է Դմիտրիևը: