ԱՊՀ դիտորդական առաքելությունը սկսել է աշխատանքը Հայաստանի խորհրդարանական ընտրությունների նախաշեմին
ԱՊՀ դիտորդական առաքելությունը սկսել է Հայաստանի Ազգային ժողովի պատգամավորների ընտրությունների դիտարկումը։ Այս մասին հայտնել է Համագործակցության գործադիր կոմիտեի մամուլի ծառայությունը, հաղորդում է ՏԱՍՍ-ը:
«Հայաստանի Հանրապետության հրավերի հիման վրա Հայաստանի Հանրապետության Ազգային ժողովի ընտրություններում ԱՊՀ դիտորդական առաքելությունը և դրա շտաբը 2026 թվականի մայիսի 18-ին սկսել են նախընտրական քարոզարշավի մոնիթորինգը»,- ասված է հաղորդագրության մեջ։
Նշվում է, որ սա արդեն 134-րդ դիտորդական առաքելությունն է ԱՊՀ-ից Համագործակցության անդամ պետությունների ընտրություններում ու հանրաքվեներում և 12-րդը՝ Հայաստանում։
Առաքելության ղեկավար, ԱՊՀ գլխավոր քարտուղարի տեղակալ Նուրլան Սեյտիմովը նշել է, որ դիտորդներն իրենց աշխատանքը կառուցում են քաղաքական չեզոքության, ընտրական գործընթացի ընթացքին և պետության ներքին գործերին չմիջամտելու սկզբունքների վրա։
Առաքելության կազմում ընդհանուր առմամբ կա շուրջ 120 մարդ, որոնցից 8-ը դիտարկում կիրականացնեն երկարաժամկետ հիմունքներով։
«Դիտարկման գործընթացի կարևորագույն բաղադրիչներն են լինելու անձնական հանդիպումները քաղաքական կուսակցությունների և դաշինքների ղեկավարության, պատգամավորության թեկնածուների, պետական մարմինների պաշտոնական ներկայացուցիչների հետ»,- նշել է Սեյտիմովը։
Այս աշխատանքը համակարգելու է առաքելության շտաբը, որն արդեն անցել է գործի և այժմ իրականացնում է դիտարկման կազմակերպման հետ կապված անհրաժեշտ միջոցառումները։
Հիշեցնենք, որ Հայաստանում հերթական խորհրդարանական ընտրությունները կկայանան հունիսի 7-ին։ Դրանց մասնակցելու համար ՀՀ ԿԸՀ հայտ է ներկայացրել 19 քաղաքական ուժ։ Ըստ ցուցակի՝ ընտրություններին կմասնակցեն 17 կուսակցություն և երկու կուսակցական դաշինք։
