Ադրբեջանական սադրանքները շարունակվելու են և դա լինելու է ՀՀ իշխանության լռության ու Արցախի նկատմամբ ունեցած պատասխանատվությունից փախուստի պայմաններում․ Տիգրան Աբրահամյան
![](https://gmpress.am/wp-content/uploads/2020/12/33.thumb_-750x450.png)
Ազգային ժողովի «Պատիվ ունեմ» խմբակցության պատգամավոր Տիգրան Աբրահամյանի դիտարկմամբ՝ Արցախում ադրբեջանցիների իրականացրած սադրանքների պատճառահետևանքային կապը շատերի համար ընկալելի կամ բացատրելի չէ, որովհետև ամբողջական տեղեկատվություն չի փոխանցվում:
«Խոսքս միայն վերջին օրերի միջադեպերին չի վերաբերվում։ Իրականում Ադրբեջանը հետպատերազմական ժամանակահատվածում մշտապես տարբեր բնույթի սադրանքների է գնացել, որի մի մասն ուղղակի չի հանրայնացվել»,-ֆեյսբուքյան իր էջում գրել է պատգամավորը:
Նա նշել է՝ ճիշտ է, ռուսական խաղաղապահ ուժերն անընդհատ կանխում են իրադրության էսկալացիոն զարգացումները, բայց դրանից ադրբեջանական ագրեսիան չի նվազում և շփման գծի տարբեր հատվածներում տարաբնույթ դրսևորումներ է ունենում։
«Ամենավտանգավորը, որը պետք է արձանագրել, հետևյալն է՝ ադրբեջանական սադրանքների քաղաքականությունը շարունակվելու է և դա տեղի է ունենալու Հայաստանի իշխանությունների լռության, կրավորական կեցվածքի, անտարբերության և Արցախի նկատմամբ ունեցած պատասխանատվությունից փախուստի պայմաններում»,-գրել է պատգամավորը: